ബെംഗളൂരു: ഒരുകാലത്ത് ശാന്തമായിരുന്ന ബെംഗളൂരുവിലെ റെസിഡൻഷ്യൽ കോളനികളും ഇടവഴികളും ഇപ്പോൾ ശ്വാസം മുട്ടിക്കുന്നത് വാഹനത്തിരക്കിലും ഹോൺ വിളികളിലുമാണ്. പ്രധാന റോഡുകളിലെ ഗതാഗതക്കുരുക്കിൽ പെടാതിരിക്കാൻ നാവിഗേഷൻ ആപ്പുകൾ കാണിച്ചുനൽകുന്ന ഇടവഴികളിലൂടെ വാഹനങ്ങൾ പാഞ്ഞുതുടങ്ങിയതോടെയാണ് ഗ്രാമീണ മേഖലകളും കോളനികളും അപകടമേഖലകളായി മാറുന്നത്. നഗരത്തിൽ വാഹനങ്ങളുടെ എണ്ണം 1.2 കോടി കടന്നതും ജൂണിൽ മാത്രം 80,000 പുതിയ വാഹനങ്ങൾ നിരത്തിലിറങ്ങിയതും പ്രതിസന്ധി രൂക്ഷമാക്കി.
സഹകാരനഗറിലെ ശാന്തിവന സെക്കൻഡ് ക്രോസ് പോലുള്ള 30 അടി മാത്രം വീതിയുള്ള ഇടറോഡുകളിൽ നിലവിൽ മിനിറ്റിൽ 60 വാഹനങ്ങൾ വരെയാണ് കടന്നുപോകുന്നത്. ആഴ്ചയിലൊരിക്കൽ എങ്കിലും ഇവിടെ അപകടങ്ങൾ ഉണ്ടാകുന്നുണ്ടെന്ന് നിവാസികൾ വ്യക്തമാക്കുന്നു. റസിഡന്റ്സ് അസോസിയേഷൻ മുൻകൈയെടുത്ത് സ്ഥാപിച്ച ബാരിക്കേഡുകൾ അധികൃതർ നീക്കം ചെയ്തതും ജനങ്ങളെ പ്രകോപിപ്പിച്ചിട്ടുണ്ട്. സമാനമായി കടുബീസനഹള്ളിയിൽ ഐ.ടി പാർക്കുകളുടെ വളർച്ചയെത്തുടർന്ന് കുന്നുകൂടിയ അനധികൃത പി.ജി ഹോസ്റ്റലുകളിലേക്ക് വരുന്ന കുടിവെള്ള ടാങ്കറുകൾ നിരന്തരം അപകടങ്ങൾ സൃഷ്ടിക്കുകയാണ്.
അതേസമയം ചില മേഖലകളിൽ ജനങ്ങളും അധികൃതരും കൈകോർത്തത് ഗതാഗതക്കുരുക്കിന് പരിഹാരമാകുന്നുണ്ട്. കോരമംഗല തേർഡ് ബ്ലോക്കിൽ സർക്കാരിന്റെ പൂർണ്ണ അനുമതിയോടെ ജനങ്ങൾ തന്നെ പണം മുടക്കി ഹൈറ്റ് ബാരിക്കേഡുകൾ സ്ഥാപിച്ചതോടെ വലിയ വാഹനങ്ങളുടെ കടന്നുകയറ്റം തടയാനായി. മറാഠഹള്ളിയിൽ വാട്സ്ആപ്പ് ഗ്രൂപ്പുകൾ വഴി ട്രാഫിക് പൊലീസുമായി സഹകരിച്ചാണ് തദ്ദേശീയർ ഗതാഗതം നിയന്ത്രിക്കുന്നത്.
പൊതുനിരത്തുകളിൽ സ്വന്തം നിലയിൽ ബാരിക്കേഡുകളോ തടസ്സങ്ങളോ സ്ഥാപിക്കുന്നത് നിയമവിരുദ്ധമാണെന്നും കർണാടക പോലീസ് ആക്ട് പ്രകാരം ഇത് കുറ്റകരമാണെന്നും നിയമവിദഗ്ധർ ചൂണ്ടിക്കാണിക്കുന്നു. പരാതികളിൽ അധികൃതർ നടപടിയെടുക്കാത്ത പക്ഷം ആർ.ടി.ഐ (RTI) വഴിയോ ഹൈക്കോടതിയെ സമീപിച്ചോ ശാശ്വത പരിഹാരം കാണാമെന്ന് നിയമ ഉപദേശകർ വ്യക്തമാക്കുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
